Шаулап-гөрләп уҙҙы «Йәнем моңо минең – башҡорт теле» концерты
Концертта эстраданың танылған, һеҙ яратҡан артистар Нәзифә Ҡадырова, Әлфиә Юлсурина, Лилиә Ишемйәрова, Римма Амангильдина, Валентина Топычканова, Хәлит Фәтихов, Искәндәр Ғәзизов, Салауат Мөхәмәтйәров, Заһир Иҫәнсурин, Рөстәм Шаһыбалов, Фәриҙә Ғаззалова, Зилиә Сәфиуллина, Тимур Рамаҙанов, Илдар Абдуллин, Радик Вәлмөхәмәтов, Миндиғәфүр Зәйнетдинов, ҡурайсылар Артур Ғәйсәров, Азат Биксурин, Рушан Биктимеров, Илнур Хәйруллин, Салауат Хәлилов һәм башҡалар ҡатнашты!
Башҡорт теле көнөнә арналған концерт программаһының сценарий авторы Башҡортостан Республикаһының атҡаҙанған мәҙәниәт хеҙмәткәре Әлфиә Ғимадиева, режиссеры Башҡортостан Республикаһының атҡаҙанған артисы Сулпан Асҡарова.
Һәм бөгөн концерт барышында СУЛПАН РӘИЛ ҠЫҘЫ Бөтә донъя башҡорттары ҡоролтайының «Ал да нур сәс халҡыңа» миҙалына лайыҡ булды. Был награданы Башҡортостан Башлығы ҡарамағындағы Мәҙәниәт советы ағзаһы, Бөтә донъя башҡорттары ҡоролтайының мәҙәниәт һәм киң мәғлүмәт саралары комиссияһы рәйесе, Башҡортостан Яҙыусылар союзының идара ағзаһы, шағирә, журналист Лариса Хашим ҡыҙы Абдуллина тапшырҙы!
«Ал да нур сәс халҡыңа» миҙалы 2010 йылдан алып күренекле мәҙәниәт, әҙәбиәт эшмәкәрҙәренә, дин әһелдәренә башҡорт халҡын берләштереү, милли мәҙәниәтте, туған телде һәм рухи ҡиммәттәрҙе һаҡлау эшендәге ҡаҙаныштары өсөн тапшырыла.
Сулпан Асҡарованы лайыҡлы награда алыуы менән ихлас ҡотлайбыҙ һәм артабан да яңы ижади үрҙәр, дәрт, илһам теләйбеҙ!
Ата-бабаларыбыҙҙан ҡалған халҡыбыҙҙың алтын мираҫы – тыуған телебеҙ — башҡорт теле көнөнә арналған концертыбыҙ шулай итеп бер тында шаулап-гөрләп уҙҙы! Ғәзиз халҡыбыҙ, гүзәл Башҡортостаныбыҙ киләсәгенә өмөт күперҙәрен нығытҡан тыуған телебеҙ байрамы менән тағы бер тапҡыр ихлас күңелдән ҡотлайбыҙ һеҙҙе хөрмәтле тамашасылар!
Милләтебеҙ, башҡорт телебеҙ, халҡыбыҙ мәңге йәшәһен!
✍: Наҙгөл Сәлихова
📸: Ләйсән Минниханова
Министерство культуры Республики Башкортостан
«Культурный мир Башкортостана»
БАШҠОРТ ТЕЛЕН ҺАҠЛАУ ҺӘМ ҮҪТЕРЕҮ ОЙОШМАҺЫ